काठमाडौं । वाणिज्य बैंकहरूले भदौ महिनाका लागि व्यक्तिगत मुद्दती निक्षेपमा ब्याजदर पुनः समायोजन गरेका छन्। कर्जा प्रवाहमा कमी आएर लगानीयोग्य रकम थुप्रिँदै गएपछि अधिकांश बैंकहरूले ब्याजदर घटाएका हुन्।

नेपालका २० वाणिज्य बैंकमध्ये ८ बैंकले ब्याजदर घटाएका छन् भने १ बैंकले बढाएको छ। बाँकी बैंकहरूले भने अघिल्लो महिना साउनकै दर कायम राखेका छन्।

नेपाल बैंकर्स संघका अनुसार साउन महिनामा व्यक्तिगत मुद्दती निक्षेपमा अधिकतम औसत ब्याजदर ५.६९ प्रतिशत रहेकोमा भदौमा झरेर ५.५७ प्रतिशतमा पुगेको छ। ब्याजदर घटाउने बैंकहरू स्ट्यान्डर्ड चार्टर्ड बैंक, लक्ष्मी सनराइज बैंक, एभरेस्ट बैंक, सानिमा बैंक, कुमारी बैंक, सिद्धार्थ बैंक, कृषि विकास बैंक, नेपाल एसबीआई बैंक  रहेका छन् । यस्तै, प्रभु बैंकले व्यक्तिगत मुद्दती निक्षेपमा दिने ब्याजदर १.१ प्रतिशत बिन्दुले बढाएर ५.३५ प्रतिशत पुर्‍याएको छ।

भदौ महिनामा सबैभन्दा बढी ब्याजदर एनआईसी एसिया बैंकले तोकेको छ। एनआईसी एसियाले व्यक्तिगत मुद्दती निक्षेपमा ६.२५ प्रतिशत ब्याज दिनेछ।