सिरहा- यहाँको लहान नगरपालिका–४ मा सञ्चालित दुई दिने मुटु तथा मधुमेह जाँच शिविरमा पाँच सय बढी बिरामीको परीक्षण गरिएको छ ।

नेपाल हृदय रोग निवारण सङ्घ ‘कार्डियो डाइबेटिक सेन्टर’द्वारा यही फागुन २६ र २७ गते सञ्चालित दुईदिने निःशुल्क शिविरमा पाँच सय ६० जनाको मुटु तथा मधुमेह परीक्षण गरिएको सेन्टरका ‘कन्सल्टेन्ट फिजिसियन’ डा .सञ्जयप्रसाद साहले जानकारी दिए ।

निःशुल्क शिविरमा मुटुको इसिजी, इको, ल्याबसहित औषधिसमेत वितरण गरिएको थियो । साहका अनुसार लहानका स्थानीय वासिन्दासमेत रहनुभएका जर्मनीमा कार्यरत मुटु चिकित्सक डा. बालकृष्ण ओग्र्यान चौधरीको विशेष पहलमा सञ्चालित शिविरमा सहिद गङ्गालाल राष्ट्रिय हृदय रोग केन्द्र तथा जर्मनीबाट आएका विशेषज्ञ चिकित्सकको टोलीले मुटु तथा मधुमेहको परीक्षण गरिएको छ ।

मुटु तथा मधुमेहको आधुनिक जाँच र गुणस्तरीय उपचारका लागि आगामी पाँच वर्षभित्र लहान नगरपालिकाले प्रदान गरेको ११ बिघा क्षेत्रफलमा दुई सय ५० शय्याको सुविधा सम्पन्न अस्पताल निर्माणको तयारी गरिएको छ । साहका अनुसार जर्मनीको ‘नेपाल मेड जर्मनी’ र ‘रोटरी क्लब कटुस’ अन्तर्राष्ट्रिय गैरसरकारी संस्थाको करिब रु दुई अर्ब आर्थिक सहयोगमा अस्पताल निर्माण प्रक्रिया सुरू गरिएको छ ।