काठमाडौं – सोमबार नेपाल प्रिमियर लिग (एनपीएल) अन्तर्गत दुई खेल हुँदैछ। यस दिन पहिलो खेल काठमान्डु गुर्खाज र चितवन राइनोज बीच हुनेछ भने दोस्रो खेल जनकपुर बोल्ट्स र कर्णाली याक्स बीच हुनेछ।

कीर्तिपुरस्थित टीयू अन्तर्राष्ट्रिय क्रिकेट मैदानमा यो खेल बिहान ९ः१५ बजे सुरु हुनेछ । यी दुवै टोली बागमती प्रदेशअन्तर्गतकै टोली हुन् । काठमाडौँको कप्तानी करण केसीले गर्नेछन् भने चितवनका कप्तान कुशल मल्ल हुन्।

त्यस्तै, आजै दिउँसो १ः१५ बजे दोस्रो खेल हुनेछ । यो खेलमा जनकपुर बोल्ट्स र कर्णाली याक्स भिड्नेछन् । एनपिएलको पहिलो उद्घाटन खेलमै विराटनगर किङ्सलाई ८ विकेटले हराएको जनकपुर बोल्ट्ससँग आत्मविश्वास छ । जनकपुर बोल्ट्स टोलीको कप्तानमा भने राष्ट्रिय क्रिकेट टोलीका अर्का खेलाडी विकेटकिपर अनिल शाह छन् । कर्णाली याक्समा नेपाली राष्ट्रिय क्रिकेट टोलीको अलराउण्डर सोमपाल कामी मार्की खेलाडीका रूपमा रहेका छन् ।