नेपालगंज– सोल्टी होटल र नेपाली लगानीकर्ताको सहकार्यमा नेपालगंजमा स्थापना भएको पाँच तारे होटल सोल्टी वेष्ट एण्ड प्रिमियर संचालनमा आएको छ ।
उक्त होटलको प्रधानमन्त्री केपी शर्मा ओली, उर्जामन्त्री वर्षमान पुन र पाँच नम्बर प्रदेशका मुख्यमन्त्री शंकर पोखरेलले संयुक्त रुपमा उद्घाटन गरेका छन् ।
सोल्टी होटल समूहले ५५ करोड रुपैयाँ लगानी गरी नेपालगंजमा संचानलमा ल्याएको होटल गत वर्ष अंग्रेजी नयाँ वर्ष पारेर सुरु भएको थियो ।
८१ कोठा सहितको सुविधा सम्पन्न होटल संचालनमा आएसँगै पर्यटनलाई आवश्यक जनशक्ति तयार गर्ने काममा पनि सक्रिय हुने होटलले जनाएको छ ।
यो होटलले नविकरणीय उर्जा प्रयोग गरेको, वर्षाको पानी प्रयोग गरेको र उत्सर्जित फोहोर पानीलाई प्रशोधन गरेर पुनः प्रयोगमा ल्याएकोमा दिल्लीमा आयोजित १४औं अन्तर्राष्ट्रिय ट्राभल अवार्ड कार्यक्रममा ’वेष्ट डेब्यु ग्रीन होटल’ को पुरस्कार समेत पाएको थियो ।
पाँच दशकदेखि काठमाडौंमा पाँच तारे होटल सोल्टी क्राउन प्लाजा संचालन गरिरहेको सोल्टी होटल समूहको काठमाडौं उपत्यका बाहिरको यो पहिलो होटल हो ।