दीपक श्रेष्ठ
अध्यक्ष
नेपाल राष्ट्रिय तथा अन्तराष्ट्रिय खेलाडी संघ

करातेका सफल खेलाडी तथा दक्षिण एसियाली खेलकुद (साग)का दुई स्वर्ण विजेता दीपक श्रेष्ठ अहिले नेपाल राष्ट्रिय तथा अन्तराष्ट्रिय खेलाडी संघको अध्यक्षको हैसियतमा खेलाडीहरुको हक अधिकारको लागि सक्रिय छन् । फुटबलबाट खेल जीवन सुरु गरेका श्रेष्ठलाई विश्वसामु भने कराते खेलले परिचित गरायो । सानैदेखी खेल प्रति मोह भएका श्रेष्ठ पढ्न भन्दा पनि खेलमा रमाउने गर्दथे । चापागाउँमा बाल्यकाल विताएका श्रेष्ठ परिवारको चाहना विपरित खेल क्षेत्रमा लागेका हुन । आज उनले आफ्नो मात्र होइन सिंगो देशको नाम विश्वसामु चिनाउन सफल छन् ।
खेल प्रतिको चाहना देखेर उनका अंकलले उनलाई चर्चित क्लब थ्रिस्टारमा खेल्ने व्यवस्था मिलाई दिए । उनले कडा मेहनतका साथ फुटबलको प्रशिक्षण लिइरहेका थिए । फुटबल प्रशिक्षणका लागि उनी साइकलमा दैनिक १४ किमीको यात्रा गर्दथे । उनको कडा मेहतनको कारण उनी सिनियर टिममा रहेर प्रशिक्षण लिइरहेका बेला विरामी भए । लामो समय विरामी भए पछि उनको परिवारले फुटबल खेल्न रोक लगाए । टाइफाइडको सिकार भएपछि उनको जीवनले नयाँ मोड लियो । गाउँकै अग्रज मिनकृष्ण मर्हजनको प्रेरणा र सहयोगले उनी कराते खेलप्रति आर्कषित हुन पुगे । उनको जीवनको नयाँ युगको आरम्भ भयो । केहि समय चापागाउँमा नै प्रशिक्षण लिएका दीपकलाई मिनकृष्ण महर्जनले दशरथ रंगशालामा करातेका प्रशिक्षण लिने व्यवस्था मिलाईदिए । त्यतिबेलासम्म कराते खेलको बारेमा उनी अनविज्ञ थिए । तर उनको कडा मेहनत र परिश्रमको कारण सफल करातेको खेलाडी बन्न सफल भए । सुरुमा श्रेष्ठ खेल क्षेत्रमा केहि गर्छु भन्दा पनि रहरका लागि खेल्ने गर्दथे । त्यहि रहर नै जिवनको कोशेढुंगा भयो । नियमित रुपमा प्रशिक्षणमा सक्रिय भएर लागे ।

करातेका सर्वाधिक सफल खेलाडीे श्रेष्ठ विभिन्न मानसम्मान र पदवीबाट पटकपटक सम्मानित भएका छन् । सुप्रबल गोरखा दक्षिण बाहु, (राजा वीरेन्द्र ०५६), विख्यात त्रिशक्ति पट्ट (राजा ज्ञानेन्द्र ०६१), राखेपबाट वेष्ट प्लेयर अवार्ड (युवराज पारस ०६०), महर्जन निर्माण सेवाबाट पल्सर बाइक (सन् २०१०) र नेविको प्रालिबाट २८ लाख पर्ने ट्रिपर (सन् २०१०) मा पुरस्कार स्वरूप प्राप्त गरेका थिए । सफलताको शिखर चढेका श्रेष्ठ भन्छन्–‘ जिवनमा जति उपलब्धी पाएको छु त्यो खेल क्षेत्रबाटै हो । परिवारको चाहनामा हिडेको भए सामान्य जागिरे मात्र हुन्थे हो ।’ खेलाडीसगैं उनले विभिन्न समयमा खेल प्रशिक्षकको रुपमा पनि काम गरेका छन् । श्रेष्ठले राष्ट्रिय खेलकुद परिषद्को २०६१ सालमा राष्ट्रिय टिमको सहायक प्रशिक्षक, २०६८ सालमा मुख्य प्रशिक्षक भएर प्रशिक्षण पनि दिएका छन् । उनले विभागिय टोली नेपाल पुलिस क्लवमा कराते प्रशिक्षकको रुपमा २०६५ देखी ६७ सम्म काम गरेका थिए । त्यसका साथै उनले विभिन्न विद्यालयहरुमा पनि कराते प्रशिक्षकको रुपमा काम गरेका छन् । सफल खेलाडीको परिचय बनाएका दीपकले देश तथा विदेशबाट प्रशिक्षण लिएर आफुलाई निखारेका छन् । १६ भन्दा राष्ट्रिय तथा अन्तराष्ट्रिय खेलमा उनले मेडल जितेका छन् ।
कुनै पनि क्षेत्रमा निरन्तर लागेको खण्डमा सफल भइन्छ भन्ने उदाहरण हुन दीपक श्रेष्ठ । उनले गरेको कडा मेहनतको प्रतिफल आज पाएका छन् । कराते खेलाडीको जिवनलाई नजिकबाट बुझेका श्रेष्ठ भन्छन– ‘हिजोको भन्दा आज खेलाडीको सेवा सुविधा राम्रो भएको छ ।

[highlight bgcolor=”#ffffff” txtcolor=”#dd3333″]करातेका सर्वाधिक सफल खेलाडीे दीपक विभिन्न मानसम्मान र पदवीबाट पटकपटक सम्मानित भएका छन् । सुप्रबल गोरखा दक्षिण बाहु, (राजा वीरेन्द्र ०५६), विख्यात त्रिशक्ति पट्ट (राजा ज्ञानेन्द्र ०६१), राखेपबाट वेष्ट प्लेयर अवार्ड (युवराज पारस ०६०), महर्जन निर्माण सेवाबाट पल्सर बाइक (सन् २०१०) र नेविको प्रालिबाट २८ लाख पर्ने ट्रिपर (सन् २०१०) मा पुरस्कार स्वरूप प्राप्त गरेका थिए ।[/highlight]

सरकारी तथा अन्य क्षेत्रबाट राम्रो खेल्ने खेलाडीको लागि सेवा सुविधा राम्रो छ । तर खेल क्षेत्रमा केहि गर्छु भन्ने खेलाडी हिजो भएपनि आज त्यस्तो छैन् ।’ तिस चालिस वर्ष अगाडीकै खेल संरचना बाहेक कुनै नयाँ संरचना बनेको छैन् । यसबाट पनि खेल क्षेत्रमा कति विकास भएको देख्न सक्ने उनी बताउँछन् । आज खेल क्षेत्रको नेतृत्व लिएका व्यक्तिहरुले राजनीतिक स्वार्थमा लाग्दा खेल क्षेत्र धरासायी हुँदै गएको उनी बताउँछन् । खेल क्षेत्रका नेतृत्वकर्ता खेलाडीको भन्दा पनि आफ्नो स्वार्थमा लाग्द खेल क्षेत्रले सोचे जस्तो परिणाम ल्याउन नसकेको श्रेष्ठको दावी छ । अहिले नियमित प्रतियोगिता नहुँदा खेलाडी अन्यौलग्रस्त अवस्थमा रहेको उनले देखेका छन् । आफ््नो जिवन राष्ट्रको लागि काम गरिरहँदा खेलाडीको लागि पनि राज्यले जिवन सुरक्षाको लागि पनि सोच्नु पर्ने हो तर त्यो भने हुन सकेको देखिदैन । यसले पनि नेपालले अन्तराष्ट्रिय क्षेत्रमा खेलकुदमा सफलता हासिल गर्न सकेको छैन् । खेलाडीको जिवन सुरक्षित छ है भन्ने प्रत्याभुति राज्यले दिनु पर्ने दीपक बताउँछन् । पदक विजेता खेलाडीलाई केहि सेवा सुविधा दिए पनि खेलाडीलाई खेल्न सक्ने वातावरण बनाउनु पर्दछ ।
खेलाडी संघको अध्यक्ष भएको नाताले पनि उनी खेलाडीको हक, अधिकारको लागि सरकारसंग निरन्तर संघर्ष गरिहेका छन् । बुबा हरि श्रेष्ठ र आमा सानुमाया श्रेष्ठका कोखबाट जन्मिएका श्रेष्ठ श्रीमती र छोरीका साथ खुशी जिवन बिताइरहेका छन् ।

प्रस्तुति : मनोज थापा