काठमाडौं ज्योति विकास बैंक लिमिटेडले रसुवाको भोटेकोसी नदीमा आएको विनाशकारी बाढी तथा त्यसबाट सिर्जित प्राकृतिक विपदबाट प्रभावित नागरिकहरूको राहत, उद्धार तथा पुनर्स्थापनाका लागि सहयोग गरेको छ ।

बैंकले प्रधानमन्त्री दैवी प्रकोप उद्धार कोषमा ५० लाख सहयोग गरेको छ । साथै, बाढीबाट क्षति पुगेका रसुवा, नुवाकोट र धादिङका समाजिक, शैक्षिक, स्वास्थ्य लगायतका क्षेत्रहरूमा पुनर्निर्माण तथा पुनर्स्थापनाका लागि समुदायस्तरमा विभिन्न कार्यक्रमअन्तर्गत चरणबद्ध रुपमा थप ५० लाखसम्मको सहयोग उपलब्ध गराउने निर्णय गरेको छ ।

विनाशकारी प्राकृतिक विपत्तिमा परी जीवन गुमाएकाहरूप्रति बैंक परिवारले श्रद्धाञ्जली अर्पण गर्दै शोकसन्तप्त परिवारजन, आफन्त तथा प्रियजनहरूप्रति गहिरो समवेदना प्रकट गरेको छ ।

साथै, यस कठिन घडीमा विपत्तिबाट प्रभावित सम्पूर्ण परिवार तथा समुदायप्रति बैंकले आफ्नो साथ, सहानुभूति र ऐक्यबद्धता व्यक्त गरेको छ ।
बाढी प्रभावित क्षेत्रमा प्रतिकूल परिस्थितिका बीच निरन्तर खोज, उद्धार, राहत तथा सुरक्षा कार्यमा अहोरात्र खटिरहेकाप्रति ऐक्यबद्धता व्यक्त गरेको छ ।

ज्योति विकास बैंकले उपत्यका र उपत्यकाबाहिर गरी हाल ११७ शाखा कार्यालय, तीन विस्तारित काउन्टर तथा ७५ वटा एटीएममार्फत बैंकिङ सेवा उपलब्ध गराउँदै आइरहेको छ ।