म्याग्दी- अमेरिकामा रहेका म्याग्देलीहरूले भोटेकोशी–रसुवा बाढीपीडितको लागि रु १० लाखभन्दा बढी सहयोग गरेका छन् ।

रोजगारी, अध्ययन र पेसा व्यवसायको शिलशिलामा रहेका म्याग्देलीहरू आबद्ध म्याग्दी समाज युएसए (अमेरिका) मार्फत रु १० लाख ३० हजार सहयोग गरेका हुन् । समाजका अध्यक्ष कमल भण्डारीले आज अमेरिकी डलर छ हजार ८०० नेपाल सरकारको प्रधानमन्त्री राहत कोषमा जम्मा गरिएको जानकारी दिनुभयो ।

संस्थाका सदस्यहरूबाट सहयोग जुटाएर सरकारको खातामा रकम जम्मा गरिएको उहाँले जानकारी दिनुभयो । संस्थाले अमेरिकामा अप्ठ्यारो र समस्यामा परेका म्याग्देलीलाई सघाउनुका साथै जन्मथलोको विपद् ब्यवस्थापन, शिक्षा, स्वास्थ्य र सामाजिक क्षेत्रमा सघाउँदै आएका छन् ।

यही भदौ १० गते भोटेकोशी नदीमा आएको बाढीका कारण प्रभावित भएको रसुवा, नुवाकोट, धादिङलगायत जिल्लामा राहत, उद्दार र पुनःनिर्माणका लागि सरकारले गरेको अपिलअनुसार म्याग्दीमा समुदाय स्तरबाट सहयोग जुट्ने क्रम जारी छ ।