काठमाडौं – गैरआवासीय नेपाली संघ (एनआरएनए) का पूर्वअध्यक्ष आरके शर्माले रसुवा बाढी प्रभावितको उद्धार तथा राहत कार्यका लागि प्रधानमन्त्री दैवीप्रकोप उद्धार कोषमा २५ लाख रुपैयाँ सहयोग गरेका छन्।

भदौ १० गते तिब्बत हुँदै नेपाल प्रवेश गरेका भोटेकोशी र त्रिशूली नदीमा आएको विनाशकारी बाढीले रसुवा, नुवाकोट, धादिङ लगायतका जिल्लामा पुर्याएको अपूरणीय मानवीय तथा भौतिक क्षतिप्रति दुःख व्यक्त गर्दै शर्माले उक्त रकम सहयोग गरेका हुन्। शुक्रबार एक विज्ञप्ति जारी गर्दै शर्माले प्राकृतिक विपत्तिको यस घडीमा ज्यान गुमाउनेहरुप्रति श्रद्धाञ्जलि अर्पण गर्दै शोकाकुल परिवारजनमा गहिरो समवेदना व्यक्त गरेका छन्। उनले घाइतेहरुको शीघ्र स्वास्थ्यलाभको कामना गर्दै पीडित परिवारलाई धैर्य धारण गर्ने शक्ति मिलोस् भनी प्रार्थनासमेत गरेका छन्।

पिजन इन्जिनियरिङ ग्रुपका अध्यक्षसमेत रहेका शर्माले विज्ञप्तिमा भनेका छन्, ‘यो सहयोगको अंकभन्दा पनि मातृभूमि संकटमा पर्दा हामी जहाँ भए पनि देशकै साथमा छौँ भन्ने हाम्रो आत्मीय भावना र दायित्वको सानो अभिव्यक्ति हो। देश बाहिर रहे पनि हाम्रो मन सधैँ मातृभूमिमै हुन्छ।’

विज्ञप्तिमा शर्माले उद्धार र राहत कार्यमा अहोरात्र खटिएका नेपाल सरकार, नेपाली सेना, नेपाल प्रहरी, सशस्त्र प्रहरी, स्थानीय तह तथा गैरसरकारी निकायहरुप्रति उच्च सम्मान व्यक्त गरेका छन्। साथै, प्रत्यक्ष रुपमा प्रभावित क्षेत्रमा पुगेर सहयोग गर्ने गैरआवासीय नेपाली संघका अभियन्ताहरु र मानवीय सद्भाव देखाउने छिमेकी राष्ट्रहरुप्रति पनि उनले आभार प्रकट गरेका छन्।

पूर्वअध्यक्ष शर्माले विश्वभर छरिएर रहेका सम्पूर्ण नेपालीलाई आफ्नो सामथ्र्यअनुसार बाढीपीडितको उद्धार, राहत र पुनस्र्थापनामा सहयोग गर्न अपिलसमेत गरेका छन्। ‘भूकम्प, महामारी र बाढीपहिरोजस्ता राष्ट्रिय संकटका बेला हामी नेपाली सधैँ एक भएर उभिएका छौँ’, उनले भनेका छन्, ‘आज फेरि त्यही एकता र मानवीय भावनालाई व्यवहारमा उतार्ने समय आएको छ। हामी सबैले हातेमालो गरेमा पीडितहरुको घाउमा मलम लगाउन र उनीहरुलाई पुनः उठ्नका लागि ठूलो हौसला प्रदान गर्न सक्छौँ।’