ठमेल पर्यटन विकास परिषद्को अध्यक्षमा राजुमान डङ्गोल विजयी भएका छन् । परिषद्को शनिबार आयोजित ३० र ३१ औँ वार्षिक साधारणसभा तथा आइतबार सम्पन्न निर्वाचनबाट डङ्गोल अध्यक्षमा निर्वाचित भएका हुन् ।

डङ्गोलले अर्का उम्मेदवार प्रश्रय राजभण्डारीलाई पराजित गर्दै अध्यक्षमा विजयी भएको निर्वाचन अधिकृत हरिप्रसाद पङ्गेनीले जानकारी दिए ।

अध्यक्ष डङ्गोलले ७२८ मत प्राप्त गर्दा राजभण्डारीले ३६५ मत मात्रै प्राप्त गरे । यस्तै, प्रथम उपाध्यक्षमा राजीव पाण्डे, द्धितीय उपाध्यक्षमा दावाङ (दावा) तामाङ, तृतीय उपाध्यक्षमा रमेश थापा विजयी भएका छन् ।

यस्तै, महासचिवमा पशुपति कँडेल ७२० मत ल्याएर नर्वाचित भएका छन् । महासचिवका अर्का उम्मेदवार पुण्यराम लागेजु ३३३ मतमा समेटिए ।

यसैगरी, सचिवमा दिलिप कँडेल, कोषाध्यक्षमा किन्चु लामु भुटिया (श्रेष्ठ) विजयी भएका छन् ।

सदस्यहरुमा सुरेन्द्र डङ्गोल, बालकृष्ण खनाल, सानुकाजी महर्जन, रोशन प्रधान (श्रेष्ठ), विश्वमान प्रधान, लिजा मानन्धर, कृष्णबहादुर सेढाईँ र चन्द्रा तामाङ विजयी भएका छन् । आगामी दुई वर्षे कार्यकालका लागि भएको निर्वाचनमा १ हजार २२५ मत खसेको थियो ।