काठमाडौँ इस्माइल साइबारीले खेल सुरु भएको मात्र ७१ सेकेन्डमै गोल गरेपछि मोरक्कोले स्कटल्यान्डलाई १–० ले पराजित गरेको छ । अमेरिकाको म्यासाचुसेट्सस्थित बोस्टन स्टेडियममा शुक्रबार भएको समूह ‘सी’ को खेलमा साइबारीको सुरुआती गोल नै निर्णायक बन्यो ।

६४ हजार १ सय ४६ दर्शकमाझ भएको प्रतिस्पर्धामा मोरक्कोले कठिन तथा शारीरिक रूपमा प्रतिस्पर्धात्मक खेलमा जित निकाल्यो । २५ वर्षीय साइबारीले गत साता ब्राजिलसँग १–१ को बराबरीमा सकिएको खेलमा पनि गोल गरेका थिए ।