काठमाडौं –  नेपालको वित्तीय इतिहासमा सबैभन्दा ठूलो वित्तीय अपराध मानिएको घटनामा बिचौलिया, ठूला उद्योगी-व्यवसायी, बीमा कम्पनीका सञ्चालक तथा नियामक निकायका पूर्वप्रमुखसहित ८१ जनाविरुद्ध चारवटा फरक-फरक मुद्दा दायर गरिएका छन् ।

सेयर बजार चलखेल, सम्पत्ति शुद्धीकरण र बैंकिङ कसुरसम्बन्धी आरोपमा इन्फिनिटी होल्डिङ्सका अध्यक्ष दीपक भट्ट, शंकर ग्रुपका साहिल अग्रवालसहित ८१ जनाविरुद्ध २३ अर्ब रुपैयाँभन्दा बढी बिगो दाबीसहित विभिन्न अदालतमा मुद्दा दायर गरिएको छ। सम्पत्ति शुद्धीकरण, धितोपत्र बजारमा कृत्रिम कारोबार, बीमा कम्पनीको कोष दुरुपयोग तथा बैंकिङ कसुरसम्बन्धी अभियोगमा बिहीबार विशेष अदालत, उच्च अदालत र जिल्ला अदालतमा मुद्दा दर्ता भएको हो ।

विशेष सरकारी वकिलको कार्यालयले दीपक भट्टसहित ३९ जनाविरुद्ध सम्पत्ति शुद्धीकरण कसुरमा २२ अर्ब ३९ करोड रुपैयाँ बिगो दाबी गर्दै विशेष अदालतमा मुद्दा दायर गरेको छ। यस प्रकरणमा शेखर गोल्छा, साहिल अग्रवाल, सुलभ अग्रवाल, उपासना पौडेल, राजबहादुर शाहलगायत व्यवसायी तथा बिमा क्षेत्रका उच्च पदाधिकारी प्रतिवादी बनाइएका छन्।

त्यसैगरी, सेयर बजारमा ‘सर्कुलर ट्रेडिङ’ मार्फत कृत्रिम कारोबार गरी मूल्यमा चलखेल गरेको आरोपमा ८१ जनाविरुद्ध धितोपत्रसम्बन्धी कसुरमा करिब १ अर्ब १४ करोड रुपैयाँ बिगो दाबीसहित काठमाडौं जिल्ला अदालतमा अभियोगपत्र दर्ता गरिएको छ।

यस्तै, बैंकिङ कसुरअन्तर्गत दीपक भट्ट, साहिल अग्रवाल, शंकरलाल अग्रवाल र सुलभ अग्रवालविरुद्ध ४२ करोड १४ लाख रुपैयाँभन्दा बढी बिगो दाबीसहित उच्च अदालत पाटनमा मुद्दा दायर भएको छ।

अभियोगपत्रअनुसार जगदम्बा स्टिल्सले विभिन्न बैंकबाट लिएको कर्जामध्ये ठूलो रकम दीपक भट्टको व्यक्तिगत खातामा सारेर सेयर लगानीमा प्रयोग गरिएको, नक्कली बैना कागजात बनाएर बैंक तथा नियामक निकायलाई झुक्याइएको तथा ब्रोकर कम्पनीमार्फत सेयर बजारमा संगठित चलखेल गरिएको आरोप छ।