काठमाडौं– टक्सार पिखुवा खोला हाइड्रोपावर लिमिटेडले पहिलो चरणमा निष्काशन गरेको आइपीओ बाँडफाँड भएको छ । कम्पनीले आयोजना प्रभावित स्थानीय र वैदेशिक रोजगारीमा रहेका नेपालीलाई निष्काशन गरेको आईपीओ आज बाँडफाँड भएको हो ।

कम्पनीले वैदेशिक रोजगारीमा रहेका नेपालीलाई फागुन २७ गतेदेखि चैत्र १ गतेसम्म ३ लाख ३ हजार ६७ कित्ता शेयर निष्काशन गरेको थियो। बिक्रि प्रबन्धक प्रभु क्यापिटलका अनुसार यस निष्काशनमा ८५ हजार २ सय १८ जनाको आवेदन परेको छ । जस मध्ये ७६ हजार २ सय ८९ जनाको आवेदन मात्र योग्य भएको छ। माग भन्दा बढीको आवेदन परेकोले गोलाप्रथाबाट शेयर बाँडफाँड गरिएको छ। जसमा ३० हजार ३ सय ६ जनाले शेयर पाएका छन् । शेयर पाएका मध्ये ७ जनाले ११ कित्ता शेयर पाएका छन् भने अरुले १० कित्ताको दरले शेयर पाएका छन् ।

त्यस्तै कम्पनीले आयोजना प्रभावित भोजपुर जिल्लाका स्थानीयलाई १२ लाख कित्ता शेयर निष्काशन गरेको थियो। यस निष्काशनमा १३ हजार ५ सय ३६ जनाको आवेदन परेको थियो। जस मध्ये १३ हजार ४ सय ७९ जनाको आवेदन मात्र योग्य भएको छ।

स्थानीयतर्फ ९० कित्तासम्म आवेदन दिनेले माग गरे बमोजिम कै शेयर पाएका छन् । १०० कित्तादेखि ५० हजार कित्तासम्म आवेदन दिनेले पनि ९० कित्ता नै शेयर पाएका छन् । शेयर पाउने मध्ये गोलाप्रथाबाट ५ हजार ३ सय ३३ जनाले थप १० कित्ता शेयर पाएका छन्। यसरी स्थानीयले अधिकतम १०० कित्तासम्म शेयर पाएका छन् ।

यस कम्पनीले भोजपुरमा ८ मेगावाट क्षमताको टक्सार पिखुवाखोला जलविद्युत आयोजना निर्माण सम्पन्न गरि २०७८ वैशाख १ गते व्यापारिक उत्पादन गरिरहेको छ । कम्पनीका अध्यक्ष अजय बल्लभ पन्त हुन्।