काठमाडौँ – नेपाल वायुसेवा निगमले काठमाडौँ–दुबई हवाई मार्गमा थप उडान सञ्चालन गर्ने भएको छ। यात्रुको चाप तथा मागलाई ध्यानमा राख्दै निगमले दुई अतिरिक्त उडान तालिका सार्वजनिक गरेको हो।

निगमका अनुसार मार्च २५ तारिखमा काठमाडौँबाट दुबईका लागि उडान सञ्चालन हुनेछ भने सोही रुटको दुबई–काठमाडौँ फिर्ता उडान मार्च २६ मा हुने तय गरिएको छ। त्यसैगरी अर्को उडान मार्च २७ मा काठमाडौँबाट प्रस्थान गर्नेछ र मार्च २८ मा दुबईबाट फर्किने तालिका रहेको छ।

उक्त उडानहरू काठमाडौँबाट स्थानीय समयअनुसार राति ११ बजेर १५ मिनेटमा प्रस्थान गर्ने गरी व्यवस्था गरिएको निगमले जनाएको छ।

निगमले पूर्व निर्धारित मितिमा टिकट लिएर यात्रा गर्न असमर्थ भएका यात्रुलाई प्राथमिकता दिइने उल्लेख गरेको छ। विशेष गरी फेब्रुअरी २८ देखि मार्चसम्मको अवधिका टिकटधारी यात्रुहरूलाई अवसर प्रदान गरिने व्यवस्था गरिएको छ।

यसैबीच, मार्च २५ र २७ का उडानमा अत्यावश्यक यात्राका लागि मात्र पुनः टिकट प्रमाणीकरण गर्नुपर्ने शर्त राखिएको छ। सिटको उपलब्धताका आधारमा पहिला सम्पर्क गर्ने यात्रुलाई प्राथमिकता दिइने निगमको सूचनामा उल्लेख छ।

अतिरिक्त उडानमार्फत यात्रु व्यवस्थापन सहज बनाउन र सेवा प्रवाहलाई प्रभावकारी बनाउने उद्देश्य लिइएको निगमले जनाएको छ।