काठमाडौँ- यसवर्ष दर्ता भएका स्वास्थ्यकर्मीहरुको सङ्ख्या तीन लाख ६६ हजार ५०५ पुगेको छ । विसं २०८० फागुनसम्म यस्तो सङ्ख्या तीन लाख २२ हजार २५४ थियो ।

उपप्रधानमन्त्री तथा अर्थमन्त्री विष्णुप्रसाद पौडेलद्वारा आज संघीय संसद्मा प्रस्तुत आव २०८१/८२ को आर्थिक सर्वेक्षणका अनुसार विसं २०८१ फागुनसम्म नेपाल मेडिकल काउन्सिल, नेपाल नर्सिङ काउन्सिल, नेपाल स्वास्थ्य व्यवसायी परिषद्, नेपाल आयुर्वेद मेडिकल परिषद्, नेपाल फार्मेसी परिषद्लगायतका निकायमा दर्ता भएका स्वास्थ्यकर्मीको सङ्ख्या यस वर्ष ४४ हजार २५१ जना थप भएको हो ।

यसैगरी, २०८१ फागुनसम्म ३२ हजार २४७ मेडिकल चिकित्सक, पाँच हजार ३४७ दन्त चिकित्सक, ११ हजार ६१६ विशेषज्ञ चिकित्सक र ३९५ विदेशी चिकित्सक गरी कुल ११ हजार ६१६ चिकित्सक नेपाल मेडिकल काउन्सिलमा दर्ता भएका छन् ।

सर्वेक्षणमा उल्लेखअनुसार २०८१ फागुनसम्म नेपाल नर्सिङ काउन्सिलमा एक हजार ६९५ विशेषज्ञ नर्स, ८५ हजार ७७८ नर्स, ३७ हजार ५२८ अनमी, ९१ मिडवाइफ र ८०० विदेशी नर्ससमेत गरी एक लाख २५ हजार ९४७ नर्स दर्ता भएका छन् ।

नेपाल स्वास्थ्य व्यवसाय परिषद्मा कुल एक लाख ६२ हजार ४९२ स्वास्थ्यकर्मी दर्ता भएका छन् । नेपाल आयुर्वेद मेडिकल परिषद्मा ६ हजार ५४२ र नेपाल फार्मेसी परिषद्मा २१ हजार ९३७ स्वास्थ्यकर्मी दर्ता भएका छन् ।

आर्थिक सर्वेक्षणले देशभर २०८१ फागुनसम्म नेपालमा प्रतिहजार जनसङ्ख्यामा १.१ चिकित्सक र प्रतिहजार जनसङ्ख्यामा २.८६ नर्स रहेकोे देखाएको छ । २०८१ फागुनसम्म डाक्टर, नर्स÷अनमी, कविराज, वैद्य, स्वास्थ्य सहायक र महिला स्वास्थ्य स्वयंसेविकासमेत गरी जम्मा एक लाख चार हजार ७९३ स्वास्थ्य जनशक्ति सरकारी सेवामा कार्यरत रहेका छन् । २०८० फागुनसम्म यस्तो सङ्ख्या एक लाख दुई हजार ५०७ थियो ।