चालु आवको फागुन मसान्तसम्म विदेशी विनिमय सञ्चिति १७ अर्ब २७ करोड अमेरिकी डलर पुगेको छ। विदेशी मुद्रा सञ्चिति चालु वर्षको शुरुमा १५ अर्ब २७ करोड रुपैयाँ थियो । चालु आवको आठ महिनामा मात्रै नेपालसँग २ अर्ब अमेरिकी डलर सञ्चिति बढेको छ ।

फागुन मसान्तसम्म विदेशी मुद्रा सञ्चिति नेपाली रुपैयाँमा २४ खर्ब ९ अर्ब २५ करोड पुगेको छ । यो सञ्चितिले १७ दशमलब २ महिनाको वस्तु आयात तथा १४.३ महिनाको वस्तु तथा सेवा आयात धान्न पर्याप्त रहेको राष्ट्र बैंकले जनाएको छ ।

वैदेशिक मुद्रा सञ्चिति र शोधनान्तर बचतले फागुन महिना पनि बढ्दो लय नै समातेको छ । चालु आवको फागुन मसान्तसम्म देशको शोधनान्तर स्थिति ३ खर्ब १० अर्ब ३७ करोड रुपैयाँले बचतमा रहेको छ । शोधनान्तर बचतले देशबाट बाहिरिने रकम भन्दा देशमा भित्रिने रकम बढेको रुपमा बुझ्न सकिन्छ । नेपालले पछिल्लो समय वैदेशिक रोजगारमा लाखौं मानिस पठाएर रेमिट्यान्स स्वरुप रकम भित्र्याइरहँदा धेरै हदसम्म शोधनान्तर स्थिति बचतमा रहन सफल भएको हो ।

नेपालको वैदेशिक व्यापार र प्रत्यक्ष वैदेशिक लगानीको अवस्था भने हरेक वर्ष निराशाजनक नै देखिएको छ । चालु आवको आठ महिनामा नेपालको आयात ११ दशमलब २ प्रतिशतले बढ्दा निर्यात भने ५७ दशमलब २ प्रतिशतले बढेको छ । भारतले प्रशोधित सोयाविन तेलको आयातमा भन्सार दर घटाउँदा त्यसको फाइदा स्वरुप पछिल्लो समय नेपालको निर्यात केही बढेको छ । निर्यात बढ्नुमा ठूलो हिस्सा यही प्रशोधित सोयाविन तेल निर्यातले गर्दा नै हो । निर्यात ५७ प्रतिशतले बढ्दा पनि नेपालको वैदिशक व्यापार घाटा भने ६ दशमलब २ प्रतिशतले बढेर ९ खर्ब ८७ अर्ब ३९ करोड रुपैयाँ पुगेको छ ।

समीक्षा अवधिमा चालु खाता रु.१८० अर्ब ८ करोडले बचतमा रहेको छ । अघिल्लो वर्षको सोही अवधिमा चालु खाता रु.१६७ अर्ब ४५ करोडले बचतमा रहेको थियो । अमेरिकी डलरमा अघिल्लो वर्षको सोही अवधिमा १ अर्ब २६ करोडले बचतमा रहेको चालु खाता समीक्षा अवधिमा १ अर्ब ३३ करोडले बचतमा रहेको छ। यसैगरी, समीक्षा अवधिमा ८ अर्ब ४९ करोड प्रत्यक्ष वैदेशिक लगानी (ईक्विटि मात्र) भित्रिएको छ । अघिल्लो वर्षको सोही अवधिमा यस्तो प्रत्यक्ष वैदेशिक लगानी (ईक्विटि मात्र) रु.५ अर्ब ६३ करोड रहेको थियो ।

चालु आवको पहिलो आठ महिनामा १० खर्ब ५१ अर्ब ७७ करोड रुपैयाँ रेमिट्यान्स भित्रिएको छ । यो अघिल्लो वर्षको सोही अवधिको तुलनामा ९ दशमलब ४ प्रतिशतले बढी हो । गत वर्ष रेमिटेयान्स आप्रवाह १८ दशमलब ३ प्रतिशतले बढेको थियो ।