बैतडीमा जीप दुर्घटना हुँदा एकको मृत्यु, दुई घाइते

बैतडीको खोडपेमा आज बिहान एक यात्रुवाहक जीप दुर्घटना हुँदा एक जनाको घटनास्थलमै मृत्यु भएको छ।

जिल्ला प्रहरी कार्यालय बैतडीका निमित्त प्रमुख तथा प्रहरी निरीक्षक दीपकबहादुर पातलीका अनुसार दार्चुलाबाट कैलालीको धनगढीतर्फ जाँदै गरेको ग१ज ५२२४ नंको याुत्रवाहक जीप बैतडीको पाटन नगरपालिका–८ आरुवाटा भन्ने ठाउँमा दुर्घटना भएको हो।

दुर्घटनामा दार्चुला जिल्ला महाकाली नगरपालिका वडा नं ९ बस्ने अन्दाजी ३५ वर्षीय ईश्वरी नागरीको मृत्यु भएको हो। उक्त दुर्घटनामा परी सोही ठाउँ बस्ने अन्दाजी २४ वर्षीय हिक्मत सामन्त (साउद) र २२ वर्षीय पुष्कर नागरी घाइते भएका छन्।

चिप्लो बाटो, पानी र कुहिरोका कारण उक्त जीप दुर्घटना भएको हुनसक्ने प्रारम्भिक अनुमान रहेको बैतडीका निमित्त प्रमुख प्रहरी निरीक्षक पातलीले बताए। उनले भने, ‘आज बिहानदेखि पानी परेको र सडकभरि कुहिरो लागेका कारण दुर्घटना भएको अनुमान गरेका छौं, विस्तृत विवरण आउन बाँकी छ।’

दुर्घटनामा परी मृत्यु भएका नागरीको शव भीरबाट उद्धार गरी अस्पताल ल्याउने काम भइरहेको प्रहरीले जनाएको छ। जीप आज बिहान करिब ५:१५ बजेको समयमा दुर्घटनामा परेको हो। जीप सडकबाट करिब ४ सय मिटर तल भीरमा खसेको प्रहरीले जनाएको छ।

© 2019 arthanepal.com All right reserved Site By : SobizTrend Technology