सानिमा लाइफ इन्स्योरेन्स कम्पनीले घातक रोगहरूविरुद्धको स्वास्थ्य सुरक्षा बिमा योजना सार्वजनिक गरेको छ । आधुनिक जीवनशैलीसँगै बढ्दै गएको घातक रोगसम्बन्धी समस्यालाई मध्यनजर गरी कम्पनीले यस्तो खालको योजना सार्वजनिक गरेको हो । कम्पनीले सञ्चालनमा ल्याएको यस योजनाअनुसार ११ वटा घातक रोगबाट हुने आर्थिक जोखिमको रक्षावरण गर्नेछ । बिमित निश्चित अतिरिक्त शुल्क भुक्तानी गरी यस्तो सुविधा लिन सक्नेछन् ।
कम्पनीले सञ्चालनमा ल्याएको योजनाअनुसार बिमित घातक रोगबाट पीडित भएको प्रमाणित भएमा सर्तको परिधिभित्र रही मूल बिमांकको आधारमा ५० लाख रुपैयाँसम्म बिमा सुविधा एकमुष्ट प्रदान गरिनेछ । कम्पनीले कडा प्रकृतिको क्यान्सर, निरन्तर डायलसिसको आवश्यकता पर्ने गरी भएको मिर्गौला विफलता, निरन्तर लक्षणसहितको मल्टिपल स्क्लेरोसिस, मुख्य अंग-बोन म्यारो प्रत्यारोपण, ओपन हार्ट सर्जरी वा मुटुका भल्भको मर्मत, प्राइमरी पलमोनरी आटिरिअल हाइपरटेन्सन, कडा प्रकृतिको प्रथम हृदयाघात, स्थायी प्रकृतिको मस्तिष्क घात, विशेष कडा प्रकृतिको कोमा, एओर्टा ग्राफ्ट शल्यक्रिया र कोरोनरी धमनी बाइपास ग्राफ्ट रोगविरुद्धको रक्षावरण गर्नेछ ।
बिमितले न्यूनतम ५० हजारदेखि ५० लाख रुपैयाँसम्मको घातक रोग बिमा सुविधा लिन सक्नेछन् । यसको बिमितको उमेर कम्तीमा १८ वर्ष पुगेको हुनुपर्नेछ भने अधिकतम ५५ वर्षको हुनुपर्नेछ । बिमा अवधि ५ वर्षदेखि २५ वर्षसम्मको हुनेछ । अधिकतम बिमा शुल्क भुक्तानी उमेर ६५ वर्षसम्म हुनेछ । यस योजनाको ९० दिन प्रतीक्षा अवधि हुनेछ । बिमा प्रारम्भ भएको वा बिमा पुनर्जागरण भएको ९० दिनपछि मात्रै जोखिम रक्षावरण सुरु हुनेछ । अस्तित्व अवधि ३० दिन कायम गरिएको छ ।