इजिप्टका पूर्व राष्ट्रपति मोहम्मद मुर्सीको अदालत परिसरमा नै मृत्यु भएको त्यहाँको सरकारी टेलिभिजनले जानकारी दिएको छ । सन् २०१३ मा सेनाले ‘कू’ गरेर उनलाई सत्ताच्यूत गरेको थियो ।
खबरका अनुसार अदालतको कारवाहीपश्चात् उनी बेहोस भएका थिए, त्यसपछि उनको उनको मृत्यु भयो । उनी ६७ वर्षका थिए । मुर्सीमाथि जासुसीको आरोप थियो । उनको कार्यकालको एक वर्षपछि जन–आन्दोलन सुरु भएको थियो त्यसपछि उनलाई हिरासतमा लिइएको थियो । त्यसपछि अधिकारीले उनी र मुस्लिम ब्रदरहुडका समर्थकविरुद्ध अभियान सुरु गरेका थिए । मुर्सीसँग सम्बन्धित मामलाको सुनुवाई राजधानी काहिरामा चलिरहेको थियो । उनीमाथि प्यालेस्टिनी इस्लामी समुह हमाससँग सम्बन्धित भएर जासुसी गरेको आरोप थियो ।
उनलाई एउटा पिंजडामा ल्याइएको थियो र अदालतलाई सम्बोधन गरेपछि उनी बेहोस भएका थिए । इजिप्टको सरकारी वकिलका अनुसार मेडिकल रिपोर्टमा मुर्सीको शरीरमा चोटको कुनै पनि निशानी भेटिएको छैन । जेलमा बन्द मुर्सीको स्वास्थ्यबारे निकै अघिदेखि चिन्ता व्यक्त गरिएको थियो । गत वर्ष अक्टोबरमा उनका कान्छा छोरा अब्दुल्लाले एपी समाचार एजेन्सीसँगको कुराकानीमा उनका पितालाई एक्लै राखिएको र उच्च रक्तचाप र मधुमेहबाट पीडित उनको उपचारमा कुनै ध्यान नदिएको बताएका थिए ।
पाँच महिना अघि अब्दुल्लाले वासिङ्टन पोष्ट पत्रिकाको सम्पादकीयमा भनेका थिए कि ‘इजिप्टको प्रशासन उनलाई चाँडोभन्दा चाँडो मरेको हेर्न चाहन्छ, उनको मृत्यु प्राकृति देखाउनका लागि उनीहरु यसो गरिरहेका छन् ।’