काठमाडौं– कुमारी बैंकले आफ्ना सेयरधनीहरुलाई २१ दशमलव २५ प्रतिशत बोनस शेयर दिने भएको छ । बैंकको सत्रौ र अठारौं वार्षिक साधारण सभाले आर्थिक वर्ष २०७३/०७४ को चुक्ता पुँजीको १२ दशमलव ७५ प्रतिशत र २०७४/०७५ को ८ दशमलव ५ प्रतिशत गरि कुल २१ दशमलव २५ प्रतिशत बोनस शेयर वितरण गर्ने प्रस्ताव पारित गरेको हो । बोनस शेयर जारी पश्चात् बैंकको चुक्ता पुँजी ८ अर्ब ६८ करोड हुनेछ ।

उक्त साधारण सभाले लेखापरीक्षकको प्रतिवेदन सहितको आ.व. २०७३/०७४ र आ.व २०७४/०७५ को आर्थिक विवरण, वासलात, नाफा नोक्सान हिसाब र सोही अवधिको नगद प्रवाह विवरण, नाफा नोक्सान बाँडफाँट हिसाब, पूँजीमा भएको परिवर्तन लगायत वार्षिक प्रतिवेदन माथि छलफल गरी पारित गरेको छ ।

त्यस्तै, बैंकले चालु आर्थिक वर्षको ९ महिनामा कुल निक्षेप ७७ अर्ब २९ करोड परिचालन तथा कुल कर्जा रकम ७३ अर्ब २४ करोड प्रवाह गरी संचालन मुनाफा १ अर्ब ४२ करोड तथा १ अर्ब खुद मुनाफा आर्जन गर्न सफल भएको छ ।

हालसम्म बैंकले बैंकले काठमाडौं उपत्यका भित्र र बाहिर गरि ८८ शाखा संजाल, ८३ एटिएम्, ३ एक्स्टेन्सन काउन्टरका साथै ३ वटा शाखारहित बैंकिङ्क इकाईमार्फत देशभरी आफ्ना सेवा प्रदान गर्दै आएको छ ।