काठमाडौं– ७८ लाख घुस काण्डमा मुछिएका पूर्वआयुक्त राजनारायण पाठकमाथि छानविन गर्न अख्तियार दुरुपयोेग अनुसन्धान आयोगले ३ सदस्यीय छानविन टोली गठन गरेको छ ।
आयोगको मंगलबार बसेको बैठकले अख्तियारका सहसचिवको नेतृत्वमा ३ सदस्यीय छानविन समिति गठन गरेको आयोगले जनाएको छ ।
अनुसन्धान गर्ने टोलीको नाम भने गोप्य राखिएको छ ।
पूर्वआयुक्त पाठकले भक्तपुरको नेपाल इन्जिनियरिङ क्याम्पसको विवाद मिलाइदिने भन्दै ७८ लाख घुस लिएको सार्वजनिक भएपछि राजीनामा दिएका थिए । पाठकमाथि सत्तारुढ दल नेकपाले महाभियोग लगाउने तयारीसँगै उनले गत फागुन ३ गते राष्ट्रपति समक्ष राजीनामा दिएका थिए ।