काठमाडौं – सिटिजन्स बैँकले अविरल वर्षाका कारण बाढी तथा पहिरोमार्फत प्रभावित भएकाहरुका लागि सरकारमार्फत सहयोग गरेक छ । बैंकले सामाजिक उत्तरदायित्व अन्तर्गत पीडितहरूको राहत र पुनःस्थापनाका लागि प्रधानमन्त्री दैवी प्रकोप, उदद्दार तथा राहत कोषमा २५ लाख रुपैयाँ सहयोग प्रदान गरेको हो ।

शहरी विकास मन्त्रालयमा आज आयोजित एक कार्यक्रमबीच कार्यवाहक प्रधानमन्त्री एवम् उपप्रधान तथा शहरी विकासमन्त्री प्रकाशमान सिंहलाई बैंकका अध्यक्ष प्रबल जंग पाण्डेले २५ लाखको चेक हस्तान्तरण गरेका हुन् ।
बैंकले सहयोग हस्तान्तरण गर्दा सञ्चार तथा सूचनाप्रविधिमन्त्री पृथ्वी सुब्बा गुरुङ ,बैंकका प्रमुख कार्यकारी अधिकृत गणेशराज पोखरेल र प्रमुख प्रशासकीय अधिकृत नारायण राज अधिकारी लगायतको उपस्थिति रहेको थियो ।
बैंकले प्रकोपबाट ज्यान गुमाएका परिवारप्रति समवेदना व्यक्त गर्दै घाईतेहरुको शीघ्र स्वस्थ लाभका लागि कामनासमेत गरेको छ । सिटिजन्स बैंक यस घटनाबाट प्रभावितहरुको राहतका लागि सरकारी कोषमार्फत सहयोग गर्ने पहिलो बैंक बनेको छ ।
सिटिजन्स बैंकले हाल १८८ वटा शाखा, १४८ वटा ए.टि.एम. र ९७ वटा शाखारहित बैंकिङ्ग ईकाईहरुबाट सेवा प्रदान गर्दै आएको छ ।